လုပ်ဖော်ကိုင်ဘက်ရောင်းရင်းများခင်ဗျာ
ကျနော် ဟီရိုရှီးမားကနေ ပြန်ရောက်လာခဲ့ပြီးတဲ့နောက် ပီနန်ဆရာတော်ကြီးက တွေ့ချင်တယ် လာဦးလို့ မနွဲ့ကနေ တဆင့်ခေါ်တဲ့အတွက် နိုဝင်ဘာ ၁၅ ရက်နေ့က သွားခဲ့ပါတယ်။ ဟီရိုရှီးမားမှာ နိုဘဲလ်ဆုရှင်တွေ က ဒေါ်အောင်ဆန်းစုကြည်နဲ့ပတ်သက်ပြီး ဘာတွေပြောသလဲ၊ ဘာတွေလုပ်သလဲဆိုတာကိုမေးပါတယ်။ ကျနော်က ဟီရိုရှီးမားအစည်းအဝေးတက်တဲ့နေ့မှာ ဒေါ်စုပုံပါတဲ့ Free Aung San Suu Kyi, Free Burma ရင်ထိုးကိုတပ်ပြီး အစည်းအဝေးခန်းထဲအသွားမှာ လမ်းမှာတွေ့တဲ့သတင်းထောက်တွေက ဒေါ်စုကိုယ်စား လှယ်မဟုတ်လား လို့မေးတယ်၊ ကျနော်က ဒေါ်စုကိုထောက်ခံတဲ့ ဂျပန်ရောက်မြန်မာတွေရဲ့ကိုယ်စား လှယ်၊ ဒေါ်စုရဲ့ကိုယ်စား လာတက်တာဖြစ်ပါတယ်လို့ဖြေခဲ့တဲ့အကြောင်းကို ပြောပြပါတယ်။
အစည်းအဝေးခန်းအ၀လည်းရောက်ရော ကျနော့်ရင်ပတ်က ရင်ထိုးကိုတွေ့တဲ့သူတိုင်းက ကျနော့်ကို ၀မ်းသာအားရနဲ့နုတ်ဆက်ကြတဲ့အကြောင်း၊ ကျနော့်အတွက်သတ်မှတ်ပေးထားတဲ့ ကိုယ်စားလှယ် Delegate တွေနေရာမှာ တာဝန်ရှိသူတွေကနေရာချထားပေးတဲ့အကြောင်းပြောပါတယ်။ ဘုန်းတော်ကြီး ဒလိုင်လားမားအစည်းအဝေးခန်းထဲဝင်လာတဲ့အချိန် လူတွေအုံးအုံးကြွက်ကြွက်ဖြစ်လာတဲ့အကြောင်း ကျနော့်ဘေးကဖြတ်သွားတဲ့အချိန်မှာ ကျနော်က ဒလိုင်လားမားလက်ကို ဆွဲကိုင်ပြီး ကျနော် မြန်မာဖြစ် ကြောင်း၊ ဒေါ်အောင်ဆန်းစုကြည်ရဲ့ကိုယ်စားလာရောက်တာဖြစ်ကြောင်းကို ပြောလိုက်တော့ ဘုန်းတော် ကြီးဒလိုင်လားမား မျက်နှာလည်း ၀င်းသွားပြီး ကျေနပ်အားရတဲ့အသံနဲ့ Oh…Good လို့ ပြန်ပြော တဲ့အကြောင်းကို ဆရာတော်ထံရှင်းပြခဲ့ပါတယ်။
ဒေါ်စုပုံ ရင်ထိုးတံဆိပ်ကြောင့် ကျနော့်ကို လူတွေက တရင်းတနှီး တလေးတစားနဲ့မိတ်ဖွဲ့စကားလာပြော ကြတာဖြစ်ကြောင်းကိုလည်း ပြောပြခဲ့ပါတယ်။ ဒီလူတွေဟာ ဒေါ်စုနဲ့ သိချင်မှသိပါလိမ့်မယ်။ ဒေါ်စုကို လူ ကိုယ်တိုင် တွေ့ဘူးချင်မှ တွေ့ဘူးပါလိမ့်မယ်။ ဒါပေမဲ့ ဒေါ်စု ပြောတဲ့စကားနဲ့ သူ့အကြောင်းတွေကို သိရှိ ထားလို့ လေးစားတဲ့စိတ်နဲ့ ကျနော့်ကို လာရောက်စကားပြောကြတာဖြစ်ပါတယ်။ အဲဒီလူတွေ ဒေါ်စုနဲ့ လူကိုယ်တိုင်တွေ့ရ စကားပြောရမယ်ဆိုရင်ဘယ်လိုနေမလဲဆိုတာကို စဉ်းစားမိတယ်ဆိုတဲ့အကြောင်း ကိုလည်း ဆရာတော်ကြီးကို ပြောပြခဲ့ပါတယ်။
အဲဒီနောက် နိုဘဲလ်ငြိမ်းချမ်းရေးဆုရှင်တွေ ပြောဆိုဆွေးနွေးကြတဲ့အကြောင်းအရာတွေ၊ သူတို့တတွေက ကျနော်တို့တတွေမမြင်မိတဲ့ မတွေးမိတဲ့အကြောင်းအဖြစ်အပျက်အနေအထားတွေကို ပြောဆိုဆွေးနွေး သွားတာတွေဟာ ကျနော့်အတွက် အင်မတန်ဗဟုသုတရတယ်ဆိုတာနဲ့ ဒီလူတွေဘာကြောင့် ကမ္ဘာကျော် ရသလဲဆိုတာကို ကောင်းကောင်းနားလည်ခဲ့တယ်ဆိုတာနဲ့ ကျနော်တို့ရဲ့ခေါင်းဆောင်ဟာလည်း သူတို့ တတွေလိုပဲ ကမ္ဘာကျော်ဖြစ်တယ်ဆိုတာကိုလည်း ဂုဏ်ယူလေးစားမိတဲ့အကြောင်း ပြောခဲ့ပါတယ်။
ဆရာတော်ကြီးက အေး အေး ကောင်းတယ် ကောင်းတယ် လို့ ကျနော့်ကို ပြောပါတယ်။ ပြီးတော့ ဒေါ်အောင်ဆန်းစုကြည်လွတ်လာတဲ့အတွက် သူ့စိတ်ထဲမှာ အင်မတန်မှ ၀မ်းမြောက်မိတဲ့အကြောင်း ပြော ပါတယ်။ နောက်ပြီးတော့ အောင်ဆန်းစုကြည်အတွက် ငါပြောချင်တဲ့စကားနည်းနည်းရှိတယ်ဆိုပြီး အခုလို ပြောပါတယ်။
လက်ရှိအခြေအနေကို ကောင်းကောင်းနားလည်ဖို့လိုအပ်တယ်။ လိမ္မာပါးနပ်မှုရှိဖို့လိုအပ်ပါတယ်တဲ့။
လုပ်စရာရှိတာတွေကို စနစ်တကျနဲ့အစီအစဉ်ဆွဲပြီးလုပ်ပါ၊ ဒါမှအောင်မြင်မှုရမှာ။ ဟိုဘက်ကလူတွေက ဘာကိုပဲလုပ်လုပ် သေသေချာချာစနစ်တကျအစီအစဉ်တကျလုပ်တဲ့အတွက် သူတို့က ငါတို့ကို အသာစီး နဲ့အုပ်ချုပ်နေတာဖြစ်တယ်ဆိုတာကိုသဘောပေါက်ဖို့လိုတယ်တဲ့။
နောက်ပြီးတော့ အောင်ဆန်းစုကြည်က outspoken ဖြစ်တယ်။ တခြားဒီမိုကရေစီနိုင်ငံတွေမှာ ဒါမျိုးပြော လို့ရှိရင် ဘာမှမဖြစ်ဘူး၊ အားလုံးကနားလည်ကြတယ်၊ နားထောင်ကြတယ်၊ ငါတို့နိုင်ငံက ငနဲတွေက ဒါမျိုး မဟုတ်ဘူး၊ ဒီတော့ နည်းနည်းလျှော့ပြီးပြောဖို့လိုလိမ့်မယ်တဲ့။
ကိုယ့်ရဲ့အင်အားစုတွေကို organize ကောင်းကောင်းလုပ်ပါ။ ဒါမှ လိုတဲ့အချိန်မှာ စုစုစည်းစည်းနဲ့လုပ်နိုင် မှာဖြစ်တယ်တဲ့။
နောက်တခုက audience ရဲ့အဆင့်ကိုနားလည်ပါတဲ့။ ပြည်သူတွေကိုပညာပေးပါတဲ့။ ဒို့ပြည်သူအများစုက ဒီမိုကရေစီဆိုတာကို ကောင်းကောင်းနားလည်ကြသေးတာမဟုတ်ဘူး၊ နောက်ပြီး လူတွေကို အသိပညာ အတွေးအခေါ်မြင့်မားလာအောင်လုပ်ပေးဖို့လိုတယ်။ ဒါမှတိုင်းပြည်တိုးတက်မှာ လို့လည်း ပြောသွား ပါတယ်။
------------------------------------------------------------------------
နောက်ပြီးတော့ မြန်မာပြည်အတွက် လှုပ်ရှားလုပ်ကိုင်နေတဲ့သူအားလုံးအတွက်လည်း အခုလိုပြောပါသေး တယ်။
တယောက်နဲ့တယောက် ညီညီညွတ်ညွတ်ရှိကြပါတဲ့။
အဖြစ်အပျက်အကြောင်းအရာမှန်သမျှကို analyse လုပ်ပါတဲ့။ ဒါမှ ဘာကိုဆက်လုပ်ရမလဲဆိုတာ နားလည် မှာဖြစ်တယ်တဲ့။
ငွေကြေးတောင့်တင်းအောင်လုပ်ကြပါတဲ့။ အဖွဲ့အစည်းနဲ့လုပ်ကြပြီဆိုရင် ငွေကြေးကုန်ကျမှုတွေများတာ မို့ ထိထိရောက်ရောက်ရှိဖို့ဆိုရင် ငွေကြေးသုံးနိုင်ဖို့လိုအပ်တယ်တဲ့။
နောက်ပြီးတော့ ကိုယ့်အားကိုယ်ကိုးပါတဲ့။ နိုင်ငံခြားအကူအညီဆိုတာ political interest, economic interest တွေပါတယ်ကွ၊ ဘယ်သူမှ ကိုယ့်အကျိုးတခုခုမရှိပဲနဲ့တော့ အကူအညီပေးမှာမဟုတ်ဘူး၊ NGO တွေမှာ ကိုယ်ကျိုးဆိုတာပါဝင်ကြတာပဲကွ။ ဥပမာ နိုင်ငံတကာကြက်ခြေနီအဖွဲ့တို့ UNHCR တို့လည်း သူတို့ အကျိုးစီးပွားပါကြတာပဲ။ ဒါပေမဲ့ သူတို့လို့အဖွဲ့တွေကိုလည်း ပစ်ပယ်လို့မရဘူး။ ငါတို့ မလုပ်နိုင်တာတွေကို သူတို့လုပ်နိုင်တာတွေရှိလို့ပဲ။ ဒီတော့ သူတို့လိုအဖွဲ့တွေရဲ့ အကူအညီကတော့ လိုအပ်တာပဲလို့ ပြောခဲ့ပါတယ်။
ဆရာတော်ကြီးဟာအသက်ကြီးနေပြီဖြစ်ပေမဲ့လည်း အတွေးအခေါ်အယူအဆဟာ ခေတ်မီပါတယ်။ မြန်မာ့ လူမှုအသိုင်းအ၀ိုင်းကို ပြောင်းလဲတိုးတက်စေလိုတဲ့စိတ်နဲ့ အမြဲစဉ်းစားလုပ်ကိုင်နေတဲ့သူဖြစ်တယ်ဆိုတာ ကို သူနဲ့အေးအေးဆေးဆေးစကားပြောခွင့်ရတဲ့အတွက် သိခဲ့ရပါတယ်။
သူက ဆန္ဒပြင်းပြရင်၊ အဲဒီအတွက် ကြိုးစားရင် အောင်မြင်မှာပဲ လို့ဆိုပါတယ်။ သူနိုင်ငံခြားထွက်လာတဲ့ အချိန်မှာ ပိုက်ဆံမရှိဘူး။ သာသနာပြုလုပ်ငန်းလုပ်ချင်စိတ်ဆိုတဲ့ဆန္ဒနဲ့ နည်းအမျိုးမျိုးကိုစဉ်းစားပြီး ကြိုးပမ်းခဲ့လို့ ပီနန်၊ ကွာလာလမ်ပူ၊ စင်္ကာပူ၊ အမေရိကန်၊ သြစတြေးလျား၊ အင်္ဂလန် စတဲ့နိုင်ငံတွေမှာ ဘုန်းကြီးကျောင်းတွေ၊ ဘုရားတွေ တည်နိုင်တာ သာသာနာပြုနိုင်တာဖြစ်တယ်။ ဒါကြောင့် အမြဲပဲ ကြိုးစားပြီး အလုပ်လုပ်ကြကွ လို့ ကျနော့်ကို သြ၀ါဒပေးပါတယ်။
ဒီအကြောင်းတွေကို ကျနော်ရဲ့လုပ်ဖော်ကိုင်ဘက်ရောင်းရင်းတွေကို အခုလို အသိပေးတာဖြစ်ပါတယ်။
ကျော်ကျော်စိုး
နိုဝင်ဘာ ၁၆ ။ ၂၀၁၀ ခုနှစ်
No comments:
Post a Comment